પેરિસમાં ઓલિમ્પિક ગેમ્સ શરૂ થઈ રહી છે , ત્યારે સો વર્ષ પૂર્વે 1924 માં પેરિસમાં રમાયેલી ઓલિમ્પિકમાં ભારતનું પ્રતિનિધિત્વ કરનાર પ્રથમ મહિલા ટેનિસ પ્લેયરને યાદ કરીએ.

નામ એનું મહેરબાઈ ટાટા ! હા, એ જ. દેશના પ્રતિષ્ઠિત ટાટા પરિવારના સર જમશેદજી ટાટાના મોટા પુત્ર સર દોરાબજી ટાટાના પત્ની. આજે પોતાની પ્રગતિ અને સત્કાર્યોને કારણે દુનિયાભરમાં જાણીતી આ કંપની માટે એક સમય એવો પણ આવેલો કે જ્યારે નાણાંના અભાવે એ ડૂબવાની તૈયારીમાં હતી. આ સમયે પોતાના કીમતી દાગીના અને ખાસ તો લગ્નમાં ભેટ મળેલ 245 કેરેટનો જુબેલી ડાયમંડ ગીરવે રાખીને ટાટા આયર્ન એન્ડ સ્ટીલ કંપની લિમિટેડને બચાવનાર તે આ મહેરબાઈ !