Tummy is the new cleavage by Dilip Kumar N Mehta

નક્કી તો એવું જ કરેલું કે આજે વિષયની બહાર એક ઇંચ પણ પગ મૂક્યા વિના ખૂબ ટૂંકમાં મારે મારી પોસ્ટ પૂરી કરી દેવી, પરંતુ કી બોર્ડ પર ફિંગર મૂકતાવેત મને મારી ટીનએજ ની હિરોઈન ડીમ્પલ યાદ આવી ગઈ , અને ખાસ તો એનું પેલું ‘પોલકા ડોટ્સ’ ! ‘બોબી’ પછી સાવ ભુલાઈ ગયેલું એ ડોટ્સ વાળું પોલકું ફરી એક વાર 1992માં જોવા મળ્યું. ફિલ્મ હતી ‘મૈંને પ્યાર કિયા” ભાગ્યશ્રી એ જરાક જુદી રીતે , પણ એને ધારણ કરેલું. હવે થોડો ઘણો તો ફેરફાર કરવો પડે ને ? બસ , આમ જ ફેશન અને ફિલ્મોની જુગલબંધી ચાલી આવે છે. સાધનાનું પેલું ચૂડીદાર કઈ ફિલ્મમાં પહેરેલું એ તો યાદ નથી , પણ , એ ચૂડીદાર બહુ ચાલ્યું.

ફેશન આઈકોન સાધના વિષે બહુ નથી લખવું પણ છેક 1966 માં એક ફિલ્મ આવેલી , જેનું નામ હતું ‘બદતમીઝ’. આ ફિલ્મમાં શમ્મી કપૂર એક ગીત ગાય છે ‘હસીન હો તુમ ખુદા નહીં હો’ . બસ , આ જ વખતે સાધનાએ લોવેસ્ટ પેન્ટ અને ક્રોપ ટોપ ધારણ કરેલું છે. અહી લિન્ક મૂકી જ છે , અને તસ્વીરો પણ. 38 વર્ષની ડોલ એશલી પણ આજે આ ક્રોપ ટોપ થી વધુ જાણીતી બની છે. 2020માં વેનિટી ફેરમાં આ સોનેરી રંગનું ક્રોપ ટોપ ધારણ કરીને એણે ભૂક્કા બોલાવી દીધેલાં !

Tummy is the new cleavage એ આજની યુવતીઓનો મંત્ર બની ગયો છે. ભૂલથી પણ સિક્સટીઝ ની કોઈ ફેશનેબલ મમ્મીએ સાધના ના જમાનાના એન્ટિક ક્રોપ ટોપ લોખંડની બેગમાં સંઘરી રાખેલા હોય તો અત્યારે એની દીકરીને કામ લાગે એવું છે !

તમને માન્યા ન આવે પણ , આ ક્રોપટોપ ના મૂળિયાં તો છેક 1893ના શિકાગો વર્લ્ડ ફેર સુધી પહોંચ્યા છે. જોકે પછી એ પ્રચલિત તો છેક 1930-40 માં થયું, લગભગ બીજા વિશ્વ યુધ્ધ વખતે. એ વખતે ફેબ્રીક નું રેશનિંગ હતું, વળી એ માત્ર સ્વિમિંગ વખતે જ પહેરવામાં આવતું. પણ , પછી સેક્સ્યુયલ ક્રાંતિ આવી , અને 1960 અને સિતેરના દાયકમાં તો એ દુનિયાભરમાં પ્રચલિત બની ગયું. અને 1990 થી તો હવે , બધા જાણે છે એમ retro fashion ની જ ફેશન ચાલે છે.